បុរសពិការ មានមហិច្ឆតាធ្វើដំណើរកាត់ប្រទេសចិនដោយកង់រទេះ ជិតសម្រេចគោលដៅ

បុរសពិការជើងទាំងសងខាងវ័យ២៩ឆ្នាំម្នាក់ កំពុងធ្វើឲ្យមនុស្សជាច្រើនកោតស្ញប់ស្ញែង បន្ទាប់ពីលោកបានធ្វើដំណើរលើចម្ងាយផ្លូវជាង ៥៦៧០ គីឡូម៉ែត្រកាត់ប្រទេសចិនដោយកង់រទេះជនពិការនិងកំពុងធ្វើដំណើរជាបន្តទៀត។

តាមប្រភពព័ត៌មាន CNN លោក Quan Peng មកពីខេត្ត Gansu ភាគខាងលិចប្រទេសចិនបានចាប់ផ្ដើមចេញដំណើរពីទីក្រុងប៉េកាំងតាំងពីខែសីហាឆ្នាំ២០១៤កន្លងទៅ។ គិតមកត្រឹមពេលនេះ លោក Quan បានធ្វើដំណើរកាត់៥ខេត្ត និងបានទៅទស្សនាទីក្រុងចំនួន៤៣ក្រុងក្នុងប្រទេសចិន។ នៅរយៈពេល៦ខែខាងមុខ Quan បានឲ្យដឹងថា លោកសង្ឃឹមថានឹងបំពេញក្ដីស្រម៉ៃរបស់ខ្លួនដោយឆ្លងទៅដល់ភាគខាងត្បូងប្រទេសចិន។ ចំពោះអ្វីដែលកំពុងធ្វើ Quan បានឲ្យដឹងថា លោកចង់លើកទឹកចិត្តអ្នកពិការដទៃទៀត និងចង់ឲ្យមនុស្សជាច្រើនចាត់ទុកលោកដូចមនុស្សធម្មតាដែរដោយមិនរើសអើង។ “ខ្ញុំឃើញថាវាដូចជាការតស៊ូជម្នះមួយ។ ខ្ញុំមិនគ្រាន់តែចង់ជម្នះលើភាពពិការរាងកាយរបស់ខ្ញុំតែមួយប៉ុណ្ណោះទេ ប៉ុន្តែគឺមិនចង់ឲ្យមនុស្សគ្រាប់គ្នារើសអើងមនុស្សពិការផងដែរ”។ នេះបើតាម Quan ប្រាប់ទៅសារព័ត៌មាន CNN។ Quan បានធ្វើដំណើរដោយថវិកាខ្លួនលោកផ្ទាល់។ អំឡុងពេលធ្វើដំណើរលោកតែងបោះតង់នៅតាមមន្ទីរពេទ្យ ឬនៅក្បែរធនាគារ និងបន្ទប់ទឹកសាធារណៈ ឬគេងលើកៅអីរបស់លោក។ ពេលខ្លះលោកព្យាយាមចូលហាងអាហារឬសណ្ឋាគារមួយចំនួនដោយចំណាយលុយតែត្រូវគេបដិសេធ។ “ម្ចាស់ហាងអាហារខ្លះបានបដិសេធមិនឲ្យខ្ញុំចូលដោយសារឃើញខ្ញុំដូចជាអ្នកសុំទាន។ ខ្ញុំបានទៅសណ្ឋាគារមួយ តែគេប្រាប់ថាមានមនុស្សកក់ពេញអស់ហើយ”។ នេះជាសម្ដីរបស់ Quan ប្រាប់ CNN៕