ទីបំផុត បក្សលោកស្រី អ៊ុង សានស៊ូជី ឡើងកាន់អំណាចថ្ងៃនេះ ក្រោយការតស៊ូជាង២ទសវត្ស

ថ្ងៃនេះជាថ្ងៃប្រវត្តិសាស្ត្ររបស់លោកស្រីអ៊ុង សានស៊ូជី និងអ្នកគាំទ្រលោកស្រី ដែលទន្ទឹងរង់ចាំអស់រយៈពេលជាង ២ទសវត្សមកហើយ។

ម្ចាស់ជ័យលាភីណូបែលសន្តិភាព និងជាមេដឹកនាំគណបក្សប្រឆាំងសម្ព័ន្ធជាតិដើម្បីប្រជាធិបតី (NLD) នឹងចូលរួមដឹកនាំរដ្ឋាភិបាលមីយ៉ាន់ម៉ាជាមួយរដ្ឋសភាថ្មីនៅថ្ងៃច័ន្ទនេះ។ គិតមកទល់ពេលនេះ មានរយៈពេល ២៦ឆ្នាំហើយ បន្ទាប់ពីលោកស្រីស៊ូជី បានឈ្នះសំឡេងភាគច្រើនក្នុងរដ្ឋសភាកាលពីឆ្នាំ ១៩៩០ តែលទ្ធផលត្រូវគណបក្សកាន់អំណាចមិនទទួលស្គាល់។ ចំណែកថ្ងៃនេះ គឺមានរយៈពេលជាង ២ខែ ក្រោយគណបក្សលោកស្រីឈ្នះឆ្នោតភ្លូកទឹកភ្លូកដីម្ដងទៀត ពោលដណ្ដើមបានអាសនៈ ៨០% ក្នុងរដ្ឋសភា នៃការបោះឆ្នោតឆ្នាំ ២០១៥។ កាលពីសុក្រសប្ដាហ៍មុន ប្រធានាធិបតីធេន សេន ដឹកនាំរដ្ឋាភិបាលបច្ចុប្បន្ន សន្យាថាសមាជិករដ្ឋាភិបាលចាស់ នឹងសហការជាមួយរដ្ឋាភិបាលថ្មី ដើម្បីនាំសន្តិភាព និងការអភិវឌ្ឍជូនប្រទេសជាតិ។ នេះបើយោងទៅតាមគេហទំព័ររបស់ប្រធានាធិបតី។ ឯសមាជិករដ្ឋសភាចាស់បានប្រារព្ធពិធីជប់លៀងសម្រាប់ថ្ងៃចុងក្រោយ នៅការិយាល័យពួកគេ ដោយមានចម្រៀង និងទស្សនារបាំជាតិផងដែរ។ ទោះបីជាគណបក្សលោកស្រីឈ្នះឆ្នោត ឡើងកាន់អំណាច តែតំណែងប្រធានាធិបតីថ្មី គេមិនទាន់ដឹងច្បាស់ថាអ្នកណានៅឡើយទេ ខណៈលោកស្រី ស៊ូជី មានស្វាមី និងកូនទាំងពីរនាក់សញ្ជាតិអង់គ្លេស ដែលច្បាប់ មិនអនុញ្ញាតឲ្យឡើងកាន់តំណែងជាប្រធានាធិបតីបានឡើយ៕